نصائح كتاب " عشان السنارة تغمز " "كااااااااملة "

نصائح كتاب " عشان السنارة تغمز " "كااااااااااااااااااااااااااااااااااملة "
للدكتورة " امل محمود "
دى النصائح بتاعه الكتاب كلها وياريت كل بنت هتقراها تاخدها كوبى عندها عشان
تعرفى تقريها فى اى وقت

النصيحة الاولى:

حبى نفسك عشان لو حبيتيها هتخليها الاحسن والاجمل والاشطر والأذكى وبالتالى كل الناس هتحبك

النصيحة الثانية:

بصى فى المراية , قومى بصى فى المراية لو اللى انتى شيفاه عاجبك يبقى هيعجب كل الناس وخلى بالك ان الناس بتشوفك بعيونك انتى
لو اللى انتى شايفاه مش عاجبك يبقى تغيريه , تخسى , تتخنى ,تغيرى قصة شعرك , طريقة حجابك والهدف مش التغيير نفسه لكن الهدف من التغيير انك تعجبى نفسك وبالتالى ثقتك فى نفسك هتزيد

النصيحة الثالثة:

لو بتقعدى مع الناس مكسوفة ومش لاقية حاجة تقوليها يبأه دة معناه انك لازم تقرى,
تتفرجى على برامج فى التيفزيون,
تتابعى الاحداث المهمة
عصر الست امينة راح خلاص دلوقتى عصر المعلومات والثقافة ولازم تسايرى العصر
عشان تقدرى تشدى اللى حواليكى بمعلوماتك وثقافتك وشخصيتك المثقفة
متركزيش على جمال شكلك وبس وتنسى جمال شخصيتك

النصيحة الرابعة:

الانسان بيتعود على الشكل بسرعة
يعنى ممكن جمالك يشد انسان لفترة قصيرة وبعد كدة هيتعود على شكلك وهيبقى عادى
وهو مش محتاج انتيكة جميلة دة محتاج انسانة
يعنى لازم تكون شخصيتك حنينة وجذابة وكدة هيشوفك جميلة طول الوقت

النصيحة الخامسة:

خلى بالك ان النجوم هي اللى بتبان وبتبقى محط انظار الجميع
يعنى لو بتدرسى لازم تبقى متفوقة فى دراستك
لو بتشتغلى لازم تبقى متفوقة فى شغلك
لو بتلعبى رياضات معينة يبقى تاخدى جوايز
يعنى خليكى نجمة *
بكدة هتضمنى انك هتكونى محط انظار الكتير وهتكونى محور اهتمام اللى حواليكى
وحلم حياة معظم الأولاد , واختارى انتى براحتك بقى

النصيحة السادسة :

لازم تختارى واحد فى بينك وبينه اهتمامات مشتركة
علشان هو دة مفتاح نجاح اى علاقة
وافتكرى دايما قصة الزوج اللى سايب مراته فى البيت ومنبهر جدا بزميلته فى العمل:(
واللى ساعات بيتجوزها على مراته لانها فاهماه وبتشاركه اهتماماته

النصيحة السابعة:

لو مفيش اهتمامات مشتركة بينكوا لكن انتى بتحبيه
يبقى لازم تشوفى هو بيحب ايه عشان تعرفى معلومات عنه
يعنى لو بيحب التاريخ مثلا يبقى تقرى فى التاريخ
لو بيحب الدين يبقى تقرى فى الدين
لو بيحب الكورة تقرى فى الكورة ولما هتنناقشيه هينبهر بثقافتك ومعلوماتك وهتشغلى تفكريه
لو معندوش اهتمامات اصلا يبقى سيبك منه
مش معقول هتتجوزى ورقة بيضا ممكن اى حد يجى يشخبط عليها
الا اذا كنتى انتى كمان معندكيش اهتمامات هع هع وصباح الفل على الناس اللى عايشين على وش الفته

النصيحة الثامنة:

لازم تعتزى بكل انجازاتك سواء انجازات دراستك او شغلك او فن او عمل اجتماعى عشان ميحسش ان حياتك كانت فاضية وهو اللى جه ملاها
او ان حياتك ملهاش لازمة من غيره .. اوعى توصليله الاحساس دة ابدا
لازم تحسسيه ان حياتك مليانة حاجات كتير ومهمة
كمان لازم تقدرى انجازاته جدا وتفتخرى بيها وتشجعيه على التقدم فى حياته كدة هيحس انك واقفة جمبه وهيقدرك اوى
ولازم انتى كمان تختارى انسان يشجعك انك تبقى احسن ويدفعك لقدام

النصيحة التاسعة :

صفات الابراج عادة بتطلع صح
خلى بالك انا قولت الصفات مش الحظ اليومى
ذاكرى شوية من صفات الابراج ومعرفتك بالبرج بتاعه هتوفر عليكى حاجات كتير اوى من صفاته
اسأليه انت برج كذا ؟؟ ولو قالك لأ
قوليله غريبة مع ان فيك صفات من البرج دة
هيقولك اشمعنى ؟
تقومى انتى بقى قايلاله كام صفة حلوين من بتوع البرج فهيفرح بنفسه
لو عرفتى برجه يبقى حلو اوى
رصيله بقى الصفات الحلوة بتاعه برجه خليكى فى المميزات وابعدى عن عيوب البرج
الصفات الحلوة هتشبع غروره كدة هيحس انك مميزة عن باقى الناس وانه شفاف قدامك وان انتى الوحيدة اللى قدرتى تشوفى المميزات
اللى الناس مش شايفاها
..
خلى بالك متصدقيش الصفات الحلوة دى وتتخدعى فيها غير لما يثبتهالك فعلا
دى اصول اللعبة ياحلوة

النصيحة العاشرة:

خلى بالك ان كتير من الرجاله بيخافوا من الجواز ومن الارتباط ومن القيود
فلازم يحس ان عندك لا مبالاة من ناحية الرجالة ولو جه كلام عن الارتباط قوليله انا مبفكرش فالموضوع دة
او الارتباط مش فارق معايا اوى
كدة انتى هتخليه ينتحر عشان يثبتلك العكس

النصيحة الحادية عشر:

لازم تتعاملى معاه بأحترام يعنى "شكرا " "لو سمحت" اسفة"
مش هات يامدهول واتفلق وورينى عرض افاك
يعنى لازم تحترميه عشان تقدرى تفرضى احترامك عليه وتجبريه انه يعاملك بأحترام
لو هو طول لسانه او مد ايده حتى بهزار يبأة تحرجيه بذوق وتوقفيه عند حده
الراجل بيتشد اوى للبنت اللى بتفرض عليه احترامها
والاحترام اساس اى علاقة سوية
لو لاحظتى دايما ان لسانه طويل او بيمد ايده ومش عامل اعتبار لأحترامك يبقى مع السلامة اديله استمارة ستة ومتعرفيهوش تانى

النصيحة الثانية عشر:

فى البداية الراجل بيحب يتكلم عن نفسه اكتر عشان يعرفك بنفسه ويتمنظر شوية
بالنسبة ليه انتى بنت زى اى بنت ومشدود ليكى شوية مش اكتر
دورك انتى بقى انك تخليه ينسى نفسه شوية ويسألك عن نفسك
ولو مسألش !! وفضل دايما يتكلم عن نفسه ومحاولش يعرف اى حاجة عنك
يبقى الاخ دة مش بيشوف حد غير نفسه وبس
يبقى بالسلامه

النصيحة الثالثة عشر :

خلى بالك تبقى دايما على طيبعتك ومتصتنعيش شخصية غير شخصيتك
لو هتمثلى دلوقتى طب هتعملى ايه كمان سنتين ؟هتقضيها تمثيل ؟؟
اتعاملى على طيبعتك واتكلمى بصراحة
دة انتى ودى شخصيتك
لو مش عاجبه يخبط دماغه فالحيط
هى دى الثقة بالنفس اللى هتخليه يجرى وراكى بالمشورا ولو مجريش وراكى يبقى مش حابب شخصيتك الحقيقية
يبقى خلاص ملوش فى الطيب نصيب
بالسلامة برضو

النصيحة الرابعة عشر :

اسمعى مشاكله فى البداية بحدود ومن باب المشاركة والتعاطف
لكن تعيشى فى دور السبع رجالة وتنتحرى عشان تساعديه وتحليله مشاكله
يبقى هتتحطى فى بند الصديقة الجدعة
او العلاقة هتتبنى على كتافك انتى وهيتعود ان انتى اللى بتحلى المشاكل وهيناملك هو فى الخط
الراجل بيحب يحس دايما انه سيد الموقف
فلما يجى يشتكى او يقول مشكله عنده
اديله ابتسامه حلوة وقوليله " انا واثقة انك هتعرف تحل الموقف دة , وانا موجودة لو فى اى مساعدة اقدر اقدمها ياريت تقولى "
كدة هيحس انك شايفاه قوى وكمان واقفة جمبه
ولو كان نصاب وداخل راسم على فلوس هيعرف ان مفيش فيكى امل وهيخلع من غير مايئذيكى

النصيحة الخامسة عشر :

ركزى فى البداية انك تكونى صديقة كويسة
يعنى بلاش نكد , بلاش رخامة , بلاش تحاولى تزنقيه علشان تطلعى منه كلام حلو او طلب للأرتباط بالعافية
ماتقعديش دايما واكلة سد الحنك وعبارة عن ودن بتسمع وبس لازم تكونى حتى فى صمتك بتتكلمى
يعنى لغة عينيكى وعضلات وشك مهمة
يعنى تتفاعلى مع اللى بتسمعيه
وبرضو ماتبقيش مملة وراديو واتفتح وهاتك يارغى كدة مرتين وهيطفش منك
اعرفى امتى تسمعى وامتى تتكلمى , يعنى لما يتكلم اسمعى ولما يسكت خدى انتى المبادرة واتكلمى فى موضوع يشده
اكتر مواضيع بتشد الرجالة
" السياسة" " الكورة " مجال شغلهم"

النصيحة السادسة عشر :

ياريت تختارى الحاجات اللى تتحكى خاصة فى البداية وهو لسه مش عارفك
يعنى بلاش مغامراتك العاطفية والولاد اللى كانوا هيموتوا عليكى
وبابا ضرب ماما امبارح بلاش فضايح وحياتك
وخلى مواضيعك كلها تبين انك انسانة مميزة مش ممزقة
وياريت تتكلمى عن اهلك كويس وتخلى صورتهم حلوة قدامه ولازم تعتزى بيهم مهما كانوا
لان اللى بيشتم فى اهله بيدى انطباع زى الزفت للى قدامه
واللى ملوش خير فى اهله ملوش خير فى حد

النصيحة السابعة عشر:

البنات عادة بتستخدم ايديها وهى بتتكلم
وممكن جدا تلمس اللى قودامها بأديها وتهزر بأديها عادى برضو
خليكى انتى مختلفة
لان الراجل بيفسر دة غلط وبيعتقد انك سهلة ومتاحة للجميع انك تهزرى معاهم بأيدك او اى حد يهزر بأيده معاكى
وبالتالى هيحطك فى اطار مش كويس
وهيبتدى هو كمان يهزر بأيده والرجالة اصلا مابتصدق

النصيحة الثامنة عشر:

خلى بالك انك لازم تبانى انك مش مهتمة تماما لان دة بيستفز اى راجل ويخليه يعملك قرد عشان تهتمى بيه
ولما يبان ان ليكى العالم بتاعك اللى واخد اهتمامك يبتدى القرد يتنطط عشان ياخد جزء من اهتمامك ويبقى من ضمن العالم بتاعك

النصيحة التاسعة عشر:

فى اول خروجة خليه هو اللى يقترح المكان لان المفروض هو اللى يعزم
فخليه يختار المكان اللى يناسب جيبه وامكانياته
لو عرضتى انك تدفعى فى اول خروجة يبقى المفروض انه يرفض
ولو عمل غير كدة فى مجتمعنا الشرقى دة يبأه حاجة من اتنين
_ يأما بخيل وبراشوت
_ ياأما بيطفشك
وفى الحالتين لازم مدة معرفتك بيه ماتتعداش الساعتين اللى انتى دفعتى تمنهم

النصيحة العشرين:

لو هتقابليه لأول مرة دة مش معناه انك تتحولى لعروسة مولد
خليكى شيك ومتحفظة فى لبسك عشان متديش انطباع مش كويس عنك
يعنى بلاش التلاتة كيلو مكياج انتى مش راحة تصورى فيديو كليب
بلاش تحسى ان اول مقابلة صعبة جدا وتبئى مرعوبة ومتوترة لازم تعرفى تسيطرى على توترك وتاخدى الموضوع ببساطة
عشان متعكيش فالكلام وتضحكى بعصبية وتبانى هربانة من العباسية
يعنى ولا تهرجى بزيادة ولا تكشرى
كونى نفسك ببساطة
ومش من اول خروجة تثقى فيه حتى لو كان سماهم على وجوههم
يعنى مفيش داعى تحكى اسرار حياتك لانه ممكن يطلع ندل وترجعى تندمى بعد كدة

النصيحة الواحد وعشرين:

فى اول خروجة ياريت تحرميه من النميمة على زمايلك والشتيمة فى صاحبتك اللى بتغير منك
وجارتك اللى ربنا فتح عليها وجابت توكتوك
يعنى ياريت تحسسيه بجوانبك الايجابية وتحسسيه بمييزاتك بس بطريقة غير مباشرة
يعنى بلاش سكة الاعلانات بتاعه
" انا احسن واحدة "
" يخرب بيت جمالى اجنن "

النصيحة الثانية والعشرين:

مش من اول خروجة تعتبريه عريس وتتعاملى معاه على الاساس دة
كدة هيخاف على حريته ويطلع يجرى
تظاهرى ان حريته فى امان وانه مش فى دماغك اصلا

النصيحة الثالثة والعشرين:

فى اول خروجة لو سألتيه
مرتبك كام ؟ عندك شقة ؟ عندك املاك ؟ عندك عربية؟
يبقى اضمنى انك مش هتشوفى وشه تانى
فى اول خروجة ماتدلقيش معلومات عنك , اكتفى بالمانشيتات العريضة وخلى التفاصيل داخل العدد
شئ من الغموض يشد اللى قدامك ويخليه عايز يشوفك مرة واتنين وتلاتة عشان يعرفك اكتر

النصيحة الرابعة والعشرين:

اوعى فى اول خروجة تشدى فنجان الشاى بتاعه وتحطيله السكر وسهوكة البنات دى
كدة هيحس انك عايزة تدبسيه وعايشة فى دور المدام من اولها

النصيحة الخامسة والعشرين:

خفة الدم مطلوبة لكن الاستظراف بلاش
يعنى اوعى تتريقى على شكله , كلامه , لدغته , لبسه
لانه ممكن برضو يبهدلك تريقة وهيبعد عنك

النصيحة الخامسة والعشرين:

فى اول خروجة اوعى تاكلى شيكولاتة ابدا ولا قبل ماتقابليه ولا وانتى معاه
لان الشيكولاتة بتفرز فى المخ مادة اسمها الدوبامين
والعلماء اثبتوا ان الفارة لما بتتحقن بالمادة دى بتحب اول فار تشوفه قدامها وبتطلعه بعد كدة من وسط ميت فار
فلو عايزاه يحبك اكليه هو شيكولاتة

النصيحة السادسة والعشرين:

مش من اول خروجة تطلبى اكل بقى وتديها
ممكن تطلبى عصير (وابعدى عن الكاكاو والهوت شوكليت , طبعا فاهمة ليه ) ههههههههههه
معظم البنات بيجيلها عثر بلع وخصوصا فى الخروجة الاولى وبتتخيل ان الكل هيسمع صوت بلعها ,وممكن ماتشربش اللى طلبته
اشربى ياختى محدش هيسمع حاجة

النصيحة السابعة والعشرين:

لازم تحطى فى دماغك ان هو اللى محل اختبار مش انتى
وهو اللى يبوس ايده وش وضهر لو عجبك ووافقتى عليه
كدة الموضوع هيبقى فى ايدك من اولها ولو عرفتى توصليله الاحساس دة هو اللى هيتوتر ويروح يدعى ويقول يارب اكون عجبتها

النصيحة الثامنة والعشرين:

اوعى تطلبى نمرة تليفونه ابدا ابدا
لازم هو اللى يديهالك " دى البداية اللى على ميه بيضا من اولها " ا

النصيحة التاسعة والعشرين:

بعد اول مقابلة لو مكلمكيش اديله يومين بالكتير وامسحى نمرته عشان حضرتك ماتضعفيش وتكلميه انتى وتبقى خيبتك تقيله
لو هو اللى اتصل دة معناه انك عجبتيه ولو متصلش يبقى معجبتيهوش
لكن لو انتى اللى اتكلمتى الاول دة معناه انك انتى اللى عايزة تعرفيه وبتحطى نفسك فى موقف وحش
واحتمال اصلا ينفضلك وميردش ويبأه منظرك وحححشششش

النصيحة الثلاثون:

الراجل ساعات مابيتصلش عشان يشوف رد فعلك مش اكتر وريله انك البنت التنكة موت اللى مش حطاه فى دماغها اصلا
لازم هو اللى ياخد الخطوة الاولى ويتصل سامعة ؟؟؟

النصيحة الواحد وثلاثون:

قولت ان بعد المقابلة الاولى لازم هو اللى ياخد الخطوة الاولى ويتصل
ساعات هو بيكون طاووس وواثق ان زيك زى غيرك واكيد هتتصلى
فلما مابتتكلميش انتى كدة بتقوليله
" لأ فتح ياحبيبى مش كل الطير اللى يتاكل لحمه "

النصيحة الثانية والثلاثون:

لو بعتلك رسالة يبقى تردى برسالة لكن اوعى هو يبعت رسالة تقومى حضرتك متصلة
وهقول تااااانى لازم هو ياخد الخطوة الاولى
لو حصل وكلمك , ياريت ميلاقيش فرح فالتليفون وناقص كمان تزغرطى
لا طبعا لازم تبقى البنت التنكة , المكالمة دى شئ متوقع اساسا
ايه الجديد ياماما ؟ دة سحرك المعتاد
وفى نفس الوقت اوعى تبقى مقموصة عشان كنتى مستنية المكالمة بدرى عن كدة
لازم يحس انك اعظم من انك تستنى مكالمته اصلا هو انتى فاضياله

النصيحة الثالثة والثلاثون:

الصيد غريزة متأصله جوه كل راجل
يعنى الراجل البدائى هو اللى كان بيصطاد الغزال ويجرى وراه
لكن تخيلى انتى بقى لو الغزال هو اللى طلع يجرى ورا الراجل !!! اكيد الراجل كان هيصاب بذعر وهيقول ان الغزال دة ملبوس وهياخد ديله فى سنانه ويطلع يجرى
ابوس ايدك ماتلعبيش دور الغزال الملبوس
خليه دايما يحس ان هو اللى بيصطادك ولازم يحس ان وجودك معاه مش مضمون وانه لو طلع برا الحدود اللى انتى حاطاها لعلاقتكوا مش هتكملى حتى لو كنتى متجوزاه ومعاكى عشر عيال

النصيحة الرابعة والثلاثون

خلى بالك اوى اوى
لما الراجل بيحس انك مش مضمونة وان وجودك فى حياته مش امر مسلم بيه بيخاف وبيعمل حسابك اوى
لكن لو الراجل ملا ايده منك وضمنك معاه او حاجة هيعملها انه هيدور على واحدة تانية تثير فيه غريزة الصيد

النصيحة الخامسة والثلاثون:

لو لقيتيه تقيل اوى ومديكى الوش الجبس ومشغل فى الخلفية اغنية ياواد ياتقيل
يبأة انتى تتقلى عليه اكتر ومتعبريهوش وتشغلى فى الخلفية اغنية " هو انت تطول "؟
لأنك لو شغلتى انت عمرى
هيشغلك هش هش ياديك

النصيحة السادسة والثلاثون:

التقل صنعة فعلا والبنت التقيلة هى اللى بتكسب وخاصة فى وجود بنات دلوقتى بتعاكس الاولاد !!
وبنات ممكن تعمل اقصى حاجة ممكن تتخيليها
انتى لازم تكونى مختلفة ومحترمة لان المحترمة فى الزمن دة هى اللى بتكسب فى الاخر

النصيحة السابعة والثلاثون:

بالنسبة للهدايا بقى
اول هدية لازم تكون ليكى مش منك
ولازم تستقبلى الهدية بحماس وانبهار " استقبال الهدايا دة فن "
لانك لو استقبلتى الهدية بطريقة باردة ممكن ميجبلكيش هدايا تانى
وفى نفس الوقت لما يجى الدور عليكى وتحبى تجيبيله هدية يبقى لازم تهتمى جدا بلفتها وبلاش نظام كيس المحل البلاستيك دة
لازم هو اللى يجيب هدية ليكى الاول ولو مجابش يبأه حاجة من اتنين
1-بخيل ومستخصر
2-غشيم وحمار
وساعتها ماتجيبلوش انتى اى هدايا لانها خسارة فيه بصراحة

النصيحة الثامنة والثلاثون:

فى حالة ظهور بنت تانية فى حياته
اوعى تعيطى وتعيشى فى دور سميرة سعيد " مش هتنازل عنك ابدا "
صدقينى مش هيفيد
وبلاش تحاولى تشوفى البنت دى وتحاولى تبقى نسخة تانية منها لان انتى كدة هتبقى الصورة وهى الاصل
وهو كدة هيختار الاصل

النصيحة التاسعة والثلاثون:

ساعات البنت بتعتقد انها لما تبأه موجودة قدام حبيبها دايما وطول الوقت انها كدة بتحميه من ظهور بنت تانية فى حياته
ولو حست ان فى بنت تانية فعلا فى حياته بتتواجد اكتر وبتتصل اكتر
لكن التصرف دة غلط جدا جدا
احيانا التواجد مبيكونش فى مصلحتك فى وجود واحدة تانية وجودك المستمر بيديه اطمئنان وبيخليه يقول
" ماهى موجودة , اعط براحتى بقى ودى كمان بتدلعنى اكتر وبتسأل عليا اكتر "
لازم تختفى وتستنى هو اللى يسأل عليكى ويجيلك لأن اختفائك دة بيديله جرس انذار انه ممكن يخسرك
وساعتها هيقارن مابينكوا وهو اللى هيختار

النصيحة الاربعين:

" ابعد حبة تزيد محبة "
افتكرى دايما المثل دة
لأن عادة الانسان البعيد بنفتكر مميزاته وبس وبنتحسر عليها

النصيحة الواحد والاربعين:

لو دخلت حياته بنت جديدة وحصلت المقارنة زى ماقولنا
لو المقارنة كانت فى صالحك يبقى كويس
لو مكانتش فى صالحك ماتوقفيش حياتك على واحد فضل عليكى بنت تانية
دة كلب وراح ومطاردته مكنتش هتجيب نتيجة اصلا متضيعيش وقتك لان الحب مش بالعافية واللى بيحبك بجد عمره ماكان هيسيبك ويجرى ورا واحدة تانيه
الحياة قدامك ومسيرك هتلاقى واحد يقدرك ويحبك بجد ويشوفك احسن واحدة بعيوبك ومميزاتك
ارجوكى ماتغيريش شخصيتك عشان خاطر حد خليكى طبيعية وزى مانتى

النصيحة الثانية والاربعين:

لو خرجتى معاه كذا مرة وعرفتوا بعض كويس ومع ذلك مش بيجيب سيرة الجواز خالص
وانتى مربوطة جمبه على امل انه ينطق ومبينطقش
يبقى تعالى على نفسك وفاتحيه انتى فالموضوع دة
واى رد تاخديه غير ميعاد مع باباكى يبأه يعتبر رفض ليكى ,,
حتى الصمت او جمله "مش عارف اقولك ايه"
معلش بقى يبقى دة بيتسلى بيكى , يبأه تكسرى وراه زير وبالسلامة

النصيحة الثالثة والاربعين:

بلاش لو مش بيتقدملك تقعدى توجديله فى اعذار او تصدقى كل حججه
الولد بيقدم اعذار للبنت عشان مايتقدملهاش وللأسف كتير من البنات بيصدقوا الاعذار دى . تعالى نعرف الاعذار دى سوا عشان تاخدى بالك

العذر الأول:
" اصل خايف اهلى مايوافقوش عليه "
ههههههههههههههههههههههه عذر اقبح من ذنب
طب هو كان جرب اصلا يتقدملك ويترفض ؟؟؟
ولو شايف انك متستاهليش المحاولة والمجازفة يبقى مايستاهلش يقابل اهلك اساسا

العذر الثانى:
" اصله بيسافر كتير "
ماشى وايه المشكلة ؟؟
هو فى قانون ان الناس اللى بتسافر مابتتجوزش ؟؟
بالعكس دة اللى بيسافر كتير دة لما بيحب بجد بيروح ورا حبيبته اخر الدنيا

العذر الثالث:
" اصل شغله واخد كل وقته"
دة تشوفيله سكرتيرة احسن لكن زوجة لا
هيعمل ايه بالزوجة وهى ملهاش وقت عنده؟
وبعدين دة لو كان بيحبك فعلا كان فضى نفسه ساعة واحدة يقابل فيها باباكى
" على فكرة الراجل لما بيحب بجد بيعمل المستحيل عشان يفضل مع حبيبته وميبعدش عنها"

العذر الرابع:
" اصل اهله عايزين يجوزوه بمعرفتهم"
دة بقى ملوش غير رد واحد بسس
" يانونو خليك جمب امك"
مفيش راجل بجد وعنده شخصية حد يقدر يفرض عليه اى حاجة وخصوصا فى الأنسانة اللى هيتجوزها
فلو هو سمع كلام مامته واتجوز بمعرفتها اى واحدة وسابك انتى
يبقى احسن انتى تحمدى ربنا انك خلصتى منه
لانه هيفضل ورا امه طول الوقت وهتشربى المر فى حياتك

العذر الخامس:
" اصله بيخاف من الجواز "
والنبى ايه ؟ هاتيله طاسة الخضة ,
لما واحد بيحب بجد مبيخفش من اى حاجة فالدنيا

العذر الرابع:
" اصله مش بيحب التسرع "
طب ربنا يديكى ويدينا طوله العمر ومستنيين دعوة فرحكوا بأذن الله ع الستين سنة كدة
يابنتى العمر بيجرى , اجرى انتى كمان وسيبى الراجل البطه دة يكاكى لوحده

العذر الخامس:
" اصله لسه بيكون نفسه "
مش عذر كافى
حتى لو كان شحات , يبقى يتقدم الاول
ودبلتين مؤقتا مش معضله يعنى

النصيحة الرابعة والأربعين:

ممكن البنت تكون هى اللى بتقدم الاعذار لنفسها وبتبرر انها تفضل جمب حبيبها من غير مايتقدملها وبتقدم الحجج للى حواليها

لو حضرتك موافقة انك تفضلى كدة جمبه من غير اى ارتباط رسمى وحجتك هى

" انه انسان كويس جدا "
يابنتى لو كان كويس جدا زى مابتقولى كان بقى واضح معاكى من الاول وطلب منك الارتباط الرسمى
الانسان الكويس مش بيلعب ببنات الناس
ولو هو انسان كويس بس مش بيحبك ومش عايز يرتبط بيكى ! يبقى ايه فايدته ؟؟
كويس لنفسه ياحبيبتى مش ليكى
او كويس لواحده تانية تعرف تلعبه على الشناكل

النصيحة الخامسة والاربعين:

لو فضلتى معاه مدة كبيرة بدون مايطلب ارتباط رسمى وكانت حجتك هى
" اصلى بحبه "
بصى ياحبيبتى سكة احبه مهما اشوف منه دى ماتنفعش خالص الا اذا كنتى بتحبى البهدلة

او كانت حجتك
" اصلى خايفة ملاقيش غيره "
طول مانتى بتفكرى بالطريقة دى هتفضلى ترضى وتوافقى على اى زبالة تقابليها فى سكتك
نصيبك موجود ومكتوبلك من قبل ماتتولدى اصلا
بلاش كلمة خايفة ملاقيش غيره دى واخلصى منه لو مش عاجبك او مكنش جد معاكى

النصيحة السادسة والاربعين:

لو مكنش بيتقدملك وكان عذره انه متجوز وعنده عيال بس انتى بتحبيه !!
طب لما هو متجوز وعنده عيال
انتى بقى بتعملى ايه فى حياته ؟ بتسليه ؟ ولا بتشبعى غروره ونقصه ؟
بلاش حد يضحك عليكى بأسم الحب وبلاش تاخدى لقب خرابة البيوت
لانه اسوأ لقب فى الدنيا
وبلاش تقولى اهو عصفور فى اليد خير من عشرة على الشجر
دة فى حاله لو كان عصفور اصلا مش بومة !
ابوس ايدك افهمى المثل صح

النصيحة السابعة والاربعين:

ساعات الراجل بيريح ويقول طب ماهى موجودة ,طب ليه التعقيد والارتباط الرسمى والمسؤلية ؟
يبقى لازم تختفى فترة ولو مسألش
يبقى بيلعب لعبة مين نفسه اطول وهيستحمل يبعد اكتر
ابوس ايدك سجلى رقم قياسى
ولو مسألش خالص يبقى للأسف محبكيش اصلا
وممكن بدل ماتختفى انك تعملى حاجة بديلة
يبقى لازم يحس انه زيه زى اى حد بلا اى خصوصية
وتبتدى تعتذرى عن خروجاته او عن الرد على رقمه وعلى طول
وتقولى اصلى كنت نايمة , كنت خارجة , اسفة عيد ميلاد صحبتى انهاردة وعاملينه مفاجئة ليها ولازم اروح

النصيحة الثامنة والاربعين:

لو حياتكوا فيها فيس بوك يبقى جميل اوى
لازم برضو يحس انه بلا خصوصية حتى على الفيس
لازم يبقى عندك قائمة اصدقاء مليانة وبتشاركى بأرائك فى الجروبات , بتعلقى على صور اصحابك
لما الراجل بيحس ان حياتك مش واقفة عليه وان عندك اصحابك ومجتمعك وشغلك بيترعب
ولو حاطط عينه عليكى مش هيستحمل كتير وهيطلب منك الارتباط الرسمى

النصيحة التاسعة والاربعين:

لو مطلبش منك الارتباط الرسمى يبقى اوعى تديله الفرصة انه يتعامل معاكى كأنكوا مرتبطين مع انه منطقهاش
هيفضل يتعامل معاكى كدة دايما ويطلع عينك عقبال ماينطقها
دة لو نطقها اصلا
اصل الراجل ياحبيبتى لما بيكون بيحبك وشاريكى بجد
بيبقى جد وواضح وصريح من اولها

النصيحة الخمسين:

لازم تديله على اد الوضع اللى هو فارضه
يعنى لو بيتعامل كصديق يبقى مجرد صديق
لكن لو بيرمى كلام ويلون ويشتغلك من غير مايقول ولا اى كلمة تتمسك عليه
يبأه انسان اى كلام
ماهو لا طلع محترم وبأه عريس ولا حتى عارف يحصل صديق
دة يبقى واحد بيعاكس مش اكتر

النصيحة الواحد وخمسين:

لو حضرتك عايزة اللى بيعاكس دة " وان كنت منصحكيش "
يبقى لازم تديله رد فعل ميتوقعوش
يعنى العادى انه لما بيلون فى الكلام مع واحدة انها بتنبسط وتسلم يبقى لو عملتى كدة بئيتى زيك زى غيرك
لكن لو كسفتيه وحسستيه انه يروح يلعب بعيد
كدة اضمنى انه هيلعب قريب فى صالون بيتكم

النصيحة الثانية والخمسين:

لازم تكونى معتمدة على نفسك
يعنى سكة تعالى ودينى روح هاتلى هتخليه يتخنق منك
اه الراجل بيحب يحس بأحتياج المرأة ليه احيانا
لكن مش لدرجة انك تتعاملى معاه على انه عبده السواق
الكلام دة كان زمان

النصيحة الثالثة والخمسين:

لو لسه طالعة من قصة حب فاشلة وفى واحد عاجبك بجد
يبأه ياريت تأجلى المعلومة دى شوية لغاية مايعرفك كويس عشان ميعتقدش انك واخدة حباية مسكن
ويتوقع منك دموع وعياط
والرجالة اللى بيستحملوا نكدنا انقرضوا خلاص مع الديناصورات
ولو فضلتى طول الوقت تشتكى من حبيبك اللى فات وتفتكريه كل شوية
مش هيقول عليكى انك صريحة لا هيقول انك لسه بتحبيه وهيخلع منك

النصيحة الرابعة والخمسين:

لازم يكون فى حدود لكل شئ
التليفونات بحدود , الخروج بحساب , والخدمة الشاملة مفيش داعى منها
والا يتقدملك ليه ويشيل المسؤليه ليه اساسا ؟
ولو اشتغل فى سكة " لو كنتى بتحبينى كنتى عملتى كذا وكذا "
يبقى اعرفى يابنت الحلال انه مش بتاع جواز وبيشتغلك

النصيحة الخامسة والخمسين:

لو الانسان اتقدملك وطلع كويس فعلا يبقى لازم تحافظى عليه وعلى اسراره وعلى منظرة قدام الناس
كدة هو كمان هيحترمك ومش هيسيبك
خلى بالك اوعى تعايريه ابدا بحاجة قالهالك قبل كدة او حصلت معاه وحطى دايما نفسك مكانه
واتصرفى باللى ترضيه لنفسك

النصيحة السادسة والخمسين:

لو ارتبطوا وبعد كدة طلب فترة بريك عشان تقيموا فيها العلاقة والكلام الفارغ دة
يبقى دة مؤشر خطر وانه عايز يخلع بذوق
قوليله : خلى البريك على طول ومعطلكش
وسيبك منه خالص

النصيحة السابعة والخمسين:

لو مبيتقدملكيش يبقى ممكن بتوفريله الحاجات دى
_ يشوفك وقت مايعوز
_ بيتكلم معاكى طول اليوم
_ كل مايتصل بتردى دايما
_ ايده بتطول وانتى مش بتمانعى
_ بتنتحرى عشان تسعديه
_ مفيش حدود بينكوا
يبقى يتقدم ليه ؟؟؟
وفى مثل امريكى بيقول " اشترى البقرة ليه لو باخد لبنها ببلاش ؟؟ "

النصيحة الثامنة والخمسين:

ابوس ايدك انسى قصة الحب الاول
دى بيضحكوا علينا بيها فى الافلام وبس
وعادة بيكون الحب الاول كارثة واسوأ حب ممكن تقابليه لان ساعتها الواحد بيكون بلا ادنى تجربة ومبيعرفش يختار صح
فبالتالى بتتنتهى القصة بالحزن والمآساه
يعنى مش دايما بيكون زى فيلم الوسادة الخالية

النصيحة التاسعة والخمسين:

طول مانتى فاكرة حبك الاول ورابطة نفسك بقصة خايبة يبقى عمرك ماهتلاقى حد تانى تحبيه
لانك ببساطة معمية نفسك ومغمية عينك ومش شايفة حد
لكن صدقينى انسى القصة الاولى الخايبة واقلبى الصفحة دى
وابتدى من جديد وانتى هتقابلى ناس احسن بكتير وكذا واحد يتمناكى

النصيحة الستين:

الحب الناجح ههو اللى بيحققلك السعادة على طول
مش شهر اه وشهرين متخاصمين !
يوم حلو وعشرة خناق
خروجة اه وتلاتة مش طايقين نفسنا
لو علاقتك من النوع دة يبأه ماتعتبرش حاجة ناجحة وبلاش جواز من اصله بقى
لانكوا اكيد مش هتكملوا مع بعض
وكمان عشان متخلفيش اطفال وتجنى عليهم بلا ذنب

النصيحة الواحد وستين:

الغيرة مطلوبة طبعا لكن بحدود
لا تخنقيه وتخافى من هلاوس
ولا تسيبيله الحبل على الغارب فيعتقد انك مش بتحبيه وانه مش فارق معاكى ويعيش حياته بقى
وترجعى انتى اللى تعيطى
خير الامور الوسط

النصيحة الثانية والستين:

لازم تسيبيله مساحة من الحرية
وانا محددتش المساحة دى لانها بترجع للشخص نفسه
يعنى لو هيستغل المساحة دى فى هواية مفيدة مثلا او رياضة او بيخرج مع اصحابه الكويسين
يبقى ساعتها تشجعيه وتبحبحيها شوية
انما بقى لو هيستغل الحرية دى فى الخروج مع اصدقاء السوء وشرب السجاير او المخدرات
او الجرى ورا دى ودى
يبقى تبحبحيها اوى ياحبيبتى وتديله استمارة ستة وبالسلامة

النصيحة الثالثة والستين:

فى كل انسان مننا عيوب ولازم تعرفى عيوب الانسان اللى قدامك كويس وتسألى نفسك بجد هل هتقدرى تعيشى مع العيوب دى وتستحمليها ولا لأ ؟؟
وخلى بالك ان فى عيوب مش بتتغير مهما عملتى للأنسان اللى قدامك
العيوب اللى مابتتغيرش هى :
البخل , الانانية , العصبية , النكد , الدم التقيل , عدم النضافة , الاهمال , العين الزايغة
ولو فيه صفة من الصفات دى وانتى مش قادرة تستحمليها يبقى ماتضغطيش على نفسك ولا تظلميه وسيبيه لواحدة تانية تقدر تستحمل الصفة دى

النصيحة الرابعة والستين:

زى مابتاخدى بالك من عيوب اللى قدامك وبتحاولى تحسنيها او تقولى انها بتضايقك
لازم كمان تقدرى صفاته الكويسة وكل الحاجات الكويسة اللى بيعملها عشانك
وزى مابتلفتى انتباهه لأى صفة او فعل مضايقك فيه
يبقى لازم كمان تقدرى وتشكريه لو عمل حاجة كويسة ليكى
دة هيخليه يتفانى دايما عشان يرضيكى ويسمعله كلمتين حلوين

النصيحة الخامسة والستين:

احترمى صمته لما يكون متضايق , يعنى متقعديش تزنى فوق دماغه عشان تعرفى سبب ضيقه
الراجل مش بيعرف يتكلم ويشكى وهو متضايق زينا غير لما بيهدى الاول
بيفضل انه يشتغل او يصلح اى حاجة او يخرج يتمشى لغاية مايهدى وبعدين يتكلم
اديله الفرصة دى ومتكتميش على نفسه عشان مايرميكيش فى البحر

النصيحة السادسة والستين:

الحب مش كلام وبس , الحب تصرفات كمان
يعنى زى مابيقولك كلام حلو لازم كمان تشوفى منه افعال جد عشان تتأكدى انه مش بيتسلى وخلاص
وانتى كمان الكلام الحلو مهم برضه بس بحدود
يعنى مش من اولها كدة تقوليله بحبك ويا بيبى ويالولو
كدة هيعتقد ان كلام الحب رخيص وسهل عندك وانك متعودة دايما
بطريقة عادل امام فى مسرحية شاهد ماشفش حاجة

النصيحة السابعة والستين:

لو مريتى بتجارب كتير وخطوبات كتير وكلها فشلت ; ماتزعليش
التجارب سواء سيئه او كويسة بتعلم الانسان وبتعرفه هو مين وعايز ايه وبالتالى بيعرف يختار صح
لكن لو متعلمتيش وكل مرة بتعملى نفس الاخطاء يبقى الفشل هيفضل وراكى
لإنك بدل ماترمى سنارتك فى بحر نضيف بترميها فى نفس الترعة

النصيحة الثامنة والستين :

الشكل مهم لكن جوهرك اهم من شكلك
فمتفرحيش باللى حبك عشان انتى جميلة او عشان شايفك مزة
دة معناه انه انسان سطحى وبكره يبيعك قدام اى مزة اشد تعدى اودامه

النصيحة التاسعة والستين:

فى مثل بيقول " قاعدة الملامة ولا جوازة الندامة "
النهاية السعيدة هى اللى انتى تختاريها فى الوقت اللى انتى تحدديه
واهم حاجة انك تكونى مستعدة تماما للجواز
يعنى انسى ضغط الاهل والمجتمع والناس والليلة دى
لان انتى اللى هتتجوزى وهتدبسى فى الاخر مش الناس
ومحدش هيعوضك عن اى لحظة تعاسة هتعيشيها لو اتجوزتى عشان خاطر اى ضغوط

النصيحة السبعين:

مش ماما وبابا اللى يختارولك الانسان اللى هتتجوزيه وانتى ملكيش لازمة
لان انتى اللى فالاخر اللى هتعيشى معاه مش هما
لكن دة مايمنعش انك تاخدى بمخاوفهم واحساسهم
وخصوصا قلب الام , لو قلقت هى يبأه خافى اوى
لان قلب الام مابيكدبش

النصيحة الواحد وسبعين:

الفرحة الحقيقية مش مجرد عريس وشبكة ويوم فرح وخلاص ولا سكة عريييس يابووى وضل راجل ولا ضل حيطة والكلام دة
المفروض الفرحة تبقى بسبب ارتباطك ببنى ادم اخلاق يحافظ عليكى ويحبك ويفهمك ويحافظ عليكى
مش واحد يتجوزك وخلاص ويكمل بيكى ديكور بيته!
الفرحة الحقيقية انك تكونى مع الانسان دة بقيه حياتك
مش بالفستان والشعر والحفلة
لو كان دة هدفك يبأه نهاية فرحتك هتكون بعد مغادرة اخر المعازيم للقاعة
بعدها هتبدأ التعاسة اللى بجد
طب ليه تعملى فى نفسك كدة ؟؟ اختارى الاول الأنسان اللى هتعيشى معاه بدل ماتخلى الاولوية لشكل فستانك

النصيحة الثانية وسبعين:

التسامح مطلوب لكن بحدود
لو سامحتى علطول ودايما يبقى هتبقى ملطشة ومش هيعملك اى حساب او اعتبار بعد كدة
كان فى مخرج معروف بالخيانة
ولما المذيع سأله وهو عجوز ليه كان بيعمل كدة مع ان مراته جميله وبتحبه
رد وقال " علشان كانت بتسامحنى دايما "

النصيحة الثالثة والسبعين:

مفيش اصلا بنت وحشة
لكن فى بنت مش مهتمة بنفسها
لو كانت مثلا نانسى عجرم مش مهتمة بنفسها كانت مش هتفرق كتير عن ام سيد بتاعه الفول
خليكى دايما مهتمة بشكلك وبلبسك ببساطة وبدون تكليف
ومن غير اى حاجة تخليكى عاملة زى الاراجوز
مفيش احسن من البساطة اللى بتخلى جمالك هادى وطبيعى

النصيحة الرابعة والسبعين:

الراجل دايما بيشوف اهوال فى شغله
فدايما بيتمنى انه لما يروح بيته يلاقى انسانة تريحه
مش تقرفه بمشاكل الجيران والبواب والعيله
مفتاح الراحة هو استيعابك ليه
ومفتاح حبه للحياه هو ضحكتك
لكن حواجب ثمانية وبوز شبرين
كدة هيهرب من البيت طول الوقت

النصيحة الخامسة والسبعين:

حنان الام اعظم شئ فى الدنيا والراجل بيفضل محتاجله حتى لو بأه عنده 80 سنه
وعادة الراجل بيدور على واحدة فيها شبه من مامته او صفاتها وحنيتها
يعنى خليكى حنينة عليه وحاسة بيه
لكن مش فى نفس حنيه امه .. والا ممكن يشوف انك مجرد ام تانية ليه وممكن يطلب منك تروحى تخطبيله بنت الجيران

النصيحة السادسة والسبعين:

لكل راجل مفاتيح بتوصلك لقلبه على طول
ومفاتيحة بتتعرف من تصرفاته وكلامه
ركزى فى كلامه عن خطيباته السابقين (وانتى عاملة نفسك مش مهتمة طبعا )
وشوفى كان بيحب فيهم ايه وبيكره ايه وايه اللى بيضايقه وانتى ساعتها هتعرفى هو بيدور على ايه
لو عرفتى مفاتيحه ومستعملتيهاش تبقى عبيطة
عرفتى مفاتيحه ومفرقتش معاكى تبقى مش بتحبيه
عرفتى مفاتيحه وعملتى عكسها تبقى بتطفشيه
عليكى دايما صريحه مع نفسك عشان ماتدبسيش وترجعى تعيطى بعد كدة

النصيحة السابعة وسبعين:

الخناق فن ومفيش اتنين مش بيتخانقوا
لازم فى الخناقة تركزى على النقط الاساسية للخناقة وبلاش الغلط والعصبية عشان متخسريش قضيتك وتتحولى من مغلوط فى حقك لغلطانة
الرجالة اصلا اساتذة فى قلب الترابيزة وتلبيسك الغلط

النصيحة الثامنة وسبعين:

لو هو اللى غلط فيكى تبأه ليلته زرقة
ولو فوتيله مرة يبقى هيغلط فيكى تانى وتالت والف
لازم تديله درس عشان يعرف غلطته بجد وميغلطش فيكى تانى
لو اتقمصتى كام يوم ورجعتى تانى وروحتى كلمتيه يبقى ولا كإنك عملتى حاجة
سيبيه خالص لما يبوس الجدم ويبدى الندم على غلطته وكونه بجم

النصيحة التاسعة وسبعين :

لو كانت كل تصرفاتك وحواراتك بتقول انك محتاجة واحد تحبيه يبقى هتلاقى متطوعين بالهبل وهيشتغلوكى للصبح
ومش هيتعاملوا معاكى بجدية ابدا
وابوس ايدك افهمى صح
" الجواز مش هدف الجواز وسيلة "
وسيلة لضمان انك هتكملى رحله حياتك مع انسان كويس بتحبيه
وصدقى المثل اللى بيقول
" جواز من غير حب بيؤدى لحب من غير جواز "

النصيحة الثمانين:

الراجل لما بيحس ان البنت صعبة بتبأه مغرية ليه اكتر
وبيحس بفخر بعد كدة لما يخطبها
ماهو السوبر مان اللى عرف يوصلك ويخطبك
يعنى متبقيش سهله ومتاحه فى اى وقت خليكى صعبة وتقيلة

النصيحة الواحد وثمانين:

استنى توأم الروح ومتستعجليش
متستعجليش على اى حاجة لان كله فى الاخر بيبقى نصيب ومقدر
يعنى الاستعجال مش هيجيب العريس بسرعة .. كل حاجة هتيجى فى وقتها سواء كنتى مستعجلة او لا
وتوأم الروح دة اللى انتى فى وجوده او غيابه بتحسى انه معاكى
الإنسان اللى بيفهمك من نظرة او من كلمة الو
الانسان اللى مش عايز من الدنيا غيرك
يعنى مش طمعان فى مرتبك او عربيتك او شقتك او مركز اهلك
.
ربنا يرزق كل بنت بالانسان اللى شبهها ويحبها بجد

النصيحة الثانية وثمانين:

لو طلب انك تقابلى مامته يبأه فى مكان عام وتكونى محترمة جدا قدام مامته
وبلاش كلام الدلع بتاع " اصل ميدو ياطنط "
كدة امه مش هتوافق عليكى ابدا

النصيحى الثالثة وثمانين:

لو مامته مسيطرة اوى وشخصيتها قوية ماتقوليلوش كدة لان مفيش راجل بيقبل كلمة وحشة على امه
الحل فى ايدك انتى ياإما تعرفى تتعاملى معاها ياإما تسيبيه قاعد جمبها
لكن لو اعتقدتى انك بعد الجواز هتقدرى تاخديه منها وتقطعيه عنها يبقى تنسى
هيطلقك ويرجعلها
لان النوع دة من الامهات بيبقى تأثيره على ولاده جبار
وعموما طالما وصلتى لمرحله مقابلة مامته يبقى الف مبروك وانتى وشطارتك بقى وربنا يوفقك وابقى اعزمينى على الفرح